പെരും മഴ

ഇത്തിരി കോപത്തിൽ എത്തി ദിവാകരൻ 

ചിത്തിര പെണ്ണിൻ കൈപിടിക്കാൻ ....

കുത്തിയൊഴുകും പെരുംമഴ പാച്ചിലിൽ 

അത്ത പൂവോക്കെയും ചിതറിപ്പോയി .

ചെത്തിയും മന്ദാര ചില്ലയും പൂക്കളാൽ 

കുമ്പിട്ടു വന്നിച്ചു പുലർ കാലേ തന്നെ 

ചെന്താമര പെണ്ണ് നാണിച്ചു നില്ക്കുന്നു 

കവിളിൽ പ്രഭാകരൻ മുത്തിയ പോൽ ...

അത്തപൂക്കളം

പൂവേ പൊലി  പൂവേ പൊലി പൂവേ പൊലി പൂവേ
പൂവാടി നിറയുന്ന ചെല്ല ചെറു കാറ്റേറ്റ് പാടി .
പൂ കൂട നിറക്കാനായ് കുന്നും മലയും താണ്ടി
പൊന്നോണം വന്നെത്തി മുറ്റത്ത്‌ ചേലിൽ ...
മുത്തശ്ശിയമ്മയും ഇടുന്നിന്നൊരു പൂക്കളം
കറ്റ കിടാങ്ങൾക്ക് കണ്‍ കുളിർക്കാനായ്
മാമല നാടിന്റെ പൊന്നോണം  വരവായ്
ഇല്ലം നിറ വല്ലം നിറ പൊന്നോണ നിലാവേ....
പുത്തിരി ചോറും പുളിങ്കറിയും വെച്ച് ...
മുത്തശ്ശി ഇന്നും വിളിക്കുന്നു എന്നെ ...

ചെമ്പകം

മുത്താരം മുത്തി മണത്തൊരു കാറ്റ്
മുത്തുക്കുട പിടിച്ചെത്തിയ നേരം
മുറ്റത്തെ ചെമ്പക പൂമരക്കൊമ്പ് ....
മുത്ത്‌ വിതറി നാണിച്ചു നിന്നു .

സൂര്യൻ

വാനത്തിൻ മേലെ തെരേറി വന്നു
മാനത്തിൻ പൊന്മുഖം ആകെ ചുവന്നു
നാണത്തിൻ സിന്ദൂരം  വാരി വിതറി
സൂര്യാംശു വന്നു തൊട്ടു തലോടി 

കാർ മേഘo

കാവുകൾക്കപ്പുറo പാടത്തിൻ മേലെ
കുടപിടിച്ചെത്തും കാർ മേഘ പെണ്ണെ
കാറ്റിൻ കൈകൾ തട്ടി നിൻ കണ്ണിൽ
കണ്ണീർ ഉതിർന്നോ മണ്ണിൽ പതിഞ്ഞോ ?

മലനാട്

മുത്തിയുയണർത്തി കോടക്കാറ്റു
മുറ്റം നിറയെ മുല്ല വിടര്ന്നു
മന്ദാരത്തിൻ ചില്ലകൾ തോറും
പുഞ്ചിരി തൂകി പൂക്കൾ വിരിഞ്ഞു

ചെത്തി പൂവും ചെമ്പക മലരും
ചെന്താമരയും കളികൾ  പറഞ്ഞു
തഞ്ചി കൊഞ്ചി പൂങ്കുല തോറും
മഞ്ഞ കിളിയും കുരുവികളും ....

അരളിപ്പൂവിൻ അരികിലിരുന്നു
തരളിതയായി വരിവണ്ട്
തുളസി കതിരുകൾ നാമം ചൊല്ലി
തുകിലുണർത്തുന്നെൻ മലനാട്

മഴതുള്ളി

താളംതുള്ളുന്ന  മഴതുള്ളിചൊല്ലി
താഴെ പോയവരാം ഞാനുമോന്നിപ്പോൾ
മണ്ണിൻ മാറിൽ കവിത രചിച്ചു
പൊന്നിൻ വിത്തുകൾ പൊട്ടി വിരിയിച്ചു .

പൊന്നാര്യൻ പാടം മാടി വിളിച്ചു
നെഞ്ചിൽ മഴയേറ്റിതാലോലം പാടി
സൂര്യാംശു വന്നു പൊന്നുമ്മ നല്കി
നെൽക്കതിർ നിന്ന് കാറ്റിൽ ഉലഞ്ഞു .

കാലം

കത്തും കനലുമായ് നെഞ്ചിലെ ആഴിയിൽ
കത്തിയമർന്നൊരു സ്നേഹത്തിൻ ദീപമേ
ഒത്തിരി ഒത്തിരി സ്നേഹത്തിൻ മുത്തുകൾ
കോർത്തൊരു മാല്യം ഞാൻ കരുതി വെച്ചിടാം .

കാലപ്രവാഹത്തിൽ കുത്തിയൊലിച്ചൊരു
കനലിൻ പ്രവാഹമായ് മണ്ണിൽ അലിഞ്ഞുവോ ?
കരുണയില്ലാത്ത കാലമേ തിരിച്ചു നല്കുനീ .
കൈവിട്ടു പോയൊരാ സ്നേഹപ്രവാഹത്തെ .

കിട്ടില്ലെന്നറിഞ്ഞിട്ടും മോഹിച്ചു പോകുന്നു
കിട്ടാക്കാനി  തേടി അലയുന്നു ഞാനിന്നും
നെഞ്ചോട്‌ ചേർത്ത് പിടിക്കുന്നതൊക്കെയും
തട്ടിത്തെറിപ്പിച്ചു കാലമാം കാട്ടാളൻ !!